Intro

大家好，我係明日女菁基金會始創董事張競詩Secy。

好多人都覺得，生活裡面，有好多意料之外嘅事，令到追夢嘅路困難重重。但其實，生命每一刻都可以夢想成真。

今集，我哋好高興，請到彭秀慧Kearen，嚟同我哋做分享，講述一下佢追夢嘅心路歷程，同埋佢係點樣用夢想感染其他人？Kearen係香港一位集編、導、演、教於一身嘅跨媒體藝術工作者。

從參與香港著名中英劇團，做舞台劇演員開始，到開設自己製作公司，監製一系列自編，自導，自演，過一百場劇場作品，再做導演。Kearen係香港公認出色嘅跨媒體創作人。

2008年，憑第二齣獨角戲《再見不再見》獲得香港舞台劇獎喜鬧劇最佳女主角，2014年當選為香港十大傑出青年。2017年，憑首部執導電影《29加1》喺法國尼斯國際影展獲得外語劇情片最佳導演獎項，翌年亦憑該電影勇奪第37屆香港電影金像獎新晉導演。

而家，就等我哋一齊嚟聽下Kearen分享佢從演員開始走到更大舞台嘅旅程。

Outro

Kearen嘅作品陪伴好多人嘅成長，包括我自己。喺人生唔同嘅階段，每一次睇佢嘅作品，都有啲唔同嘅感覺，甚至觸動到內心嘅痛點。

贏盡觀眾掌聲同埋眼淚嘅背後，Kearen話，失敗係冇得驚，好似佢咁保持初心，不斷努力同嘗試，先可以將失敗變為成長，為人生創造唔只一種嘅可能性。我覺得，與其話每一次都係由零開始，不如話過往付出嘅每一步，就係為未來埋下伏筆。

所以，即使嗰一刻得唔到想要嘅結果，我哋都千祈唔好睇少每一次嘅努力，更加唔好質疑自己，因為我哋最後發揮到嘅影響力，可能超越我哋自己嘅想像。就好似Kearen咁，從小夢想做演員，到做編劇、導演、導師，仲組織埋義工團，通過戲劇嚟回饋社會。雖然角色有所唔同，但初衷同夢想始終未變。

透過唔同嘅媒體表達，將想法帶入觀眾嘅內心，影響咗無數嘅觀眾。Kearen所做嘅，正正就係我哋所講嘅Dream, Lead, Make an Impact.

引用Karen《月球下的人》劇中小說家嘅一句話，將夢想睇得好近嘅人才會成功。同一天空下，我哋一起飛翔。

希望大家同Kearen一樣，懷有一顆善良嘅心，向夢想進發，發揮自身影響力，令世界變得更好。

請留意《Dream Teller》專訪系列，我哋會喺城中繼續邀請唔同行業，唔同崗位嘅嘉賓分享自己嘅故事。唔知我下一集又會遇到邊個Dream Teller呢?

https://www.youtube.com/watch?v=ZNSXpylCzd4