Intro

大家好，我係明日女菁基金會始創董事張競詩Secy。

時尚係好美麗，但係美麗嘅背後，大家又有冇反思過呢個美麗嘅代價呢？全球時裝業界喺生產背後引起嘅問題，包括資源運用、污染、速食文化下快速時尚過度生產造成嘅浪費。時裝業界開始去嘗試正視呢啲問題，例如，增加可持續發展方面嘅設計、服裝回收。

但究竟唔喺時裝界工作嘅你同我，作為消費者，又點樣可以出一分力呢？

今集，我哋好高興，請到時間縫紉師林蔚彥Toby Crispy同我哋做專訪。

Toby做過時裝設計師、雜誌編輯、國際品牌設計部管理層。究竟，時間縫紉師係咪一種嶄新嘅職業呢？

今集，佢會同我哋分享一下，佢點樣用創意去幫手治療佢口中壞咗嘅時裝工業，美麗，而又有意義。

Outro

Toby Crispy喺時裝體系中擔當過唔同角色，咁多年嚟為尋找理想中嘅時裝而奔波。最終，畀佢搵到佢心目中永續時尚嘅定義。Toby而家做緊嘅嘢，除咗講求環保之外，仲講求美學。環保都可以好靚好型，佢講嘅環保使命，最觸動我嘅，莫過於改造離世親人嘅舊衣，延續親情。

每件衣物都承載住唔同時間，甚至係唔同年代嘅故事。傳承，除咗衣物之外，仲有人同人之間嘅連繫。透過升級再造，重塑時尚，去品味時間嘅價值，擔當時間縫紉師，讓更多人留住時間下嘅故事。

希望大家聽完Toby今集嘅分享之後，擴闊對環保時裝嘅觀念，亦明白到，每個人對於可持續發展，都可以出一分力。為未來，我哋可以追求真正美麗嘅時尚，任何嶄新嘅行業，亦都可以好似Toby咁樣，一步一步由自己行出嚟。

請留意《Dream Teller》專訪系列，我哋會喺城中繼續邀請唔同行業，唔同崗位嘅嘉賓分享自己嘅故事。唔知我下一集又會遇到邊個Dream Teller呢?

https://www.youtube.com/watch?v=oUvoRDa19uc